Վառելիք, ծրագրերի բաժանորդագրություն, գովազդ սոցցանցերում, նյութեր, ճանապարհածախս։ Փոքր և միջին բիզնեսներում այս ծախսերի մի մասը հաճախ վճարվում է սեփականատիրոջ կամ աշխատակցի անձնական քարտով՝ որովհետև այդպես արագ է, ընկերության քարտը մոտը չէր, կամ մատակարարը ընդունում էր միայն քարտով վճարում։ Ինքնին դա սխալ չէ։ Խնդիրը սկսվում է այն ժամանակ, երբ այդ ծախսերը այդպես էլ չեն հասնում ընկերության հաշվառմանը։
Ինչու է սա խնդիր
- Շահույթը սխալ է երևում։ Եթե ծախսերի մի մասը հաշվառման մեջ չկա, հաշվետվությունը ցույց է տալիս ավելի մեծ շահույթ, քան իրականում կա, և դուք որոշումներ եք կայացնում կիսատ պատկերով։
- Ծախսը հարկային առումով կարող է չընդունվել։ Առանց պատշաճ փաստաթղթի (օրինակ՝ ընկերության անունով դուրս գրված հաշիվ-ապրանքագրի) ծախսը կարող է չնվազեցվել հարկվող շահույթից։ Կոնկրետ հետևանքները կախված են ձեր հարկման ռեժիմից։
- Ձեր անձնական գումարը ոչ մի տեղ գրանցված չէ։ Դուք փաստացի ֆինանսավորել եք ընկերությանը, բայց դա չի երևում ոչ որպես փոխհատուցման ենթակա գումար, ոչ էլ որպես սեփականատիրոջ փոխառություն։
- Անձնական և բիզնես գումարները խառնվում են։ Ժամանակի հետ դժվարանում է հասկանալ՝ որն էր բիզնեսի ծախս, որը՝ անձնական, հատկապես անհատ ձեռնարկատերերի մոտ։
Ինչ անել, երբ ծախսն արդեն վճարված է
- Պահեք փաստաթուղթը։ ՀԴՄ կտրոն, հաշիվ, պայմանագիր, առցանց ծառայության invoice։ Լուսանկարը նույնպես օգնում է, բայց բնօրինակը կամ էլեկտրոնային տարբերակը ավելի լավ է։
- Խնդրեք հաշիվ-ապրանքագիր ընկերության անունով։ Հայաստանյան մատակարարից խնդրեք դուրս գրել էլեկտրոնային հաշիվ-ապրանքագիր ընկերության ՀՎՀՀ-ով, նույնիսկ եթե վճարել եք անձնական քարտով։ Արտասահմանյան ծառայությունների (գովազդ, ծրագրեր) դեպքում հաշվի մեջ նշեք ընկերության անվանումն ու տվյալները։
- Փոխանցեք հաշվապահին ամեն ամիս, ոչ թե տարեվերջին։ Կարճ ցանկ՝ ամսաթիվ, գումար, ինչի համար, ով է վճարել։
- Որոշեք՝ ինչպես է գրանցվելու գումարը։ Սովորաբար երկու տարբերակ կա. ընկերությունը փոխհատուցում է ծախսը փաստաթղթերի հիման վրա, կամ գումարը գրանցվում է որպես ընկերության պարտք սեփականատիրոջը։ Կարևոր է, որ ընտրությունը լինի գիտակցված և փաստաթղթավորված։
Ինչպես կանխել նույն խնդիրը հետագայում
- Առանձին բանկային քարտ միայն բիզնեսի ծախսերի համար, այդ թվում՝ բաժանորդագրությունների և գովազդի։
- Պարզ ներքին կանոն. ով կարող է վճարել անձնական քարտով, մինչև որ գումարը և քանի օրում է ներկայացվում փաստաթուղթը։
- Ամսական համադրում. բանկային քաղվածքները, դրամարկղը և անձնական քարտով ծախսերի ցանկը համեմատվում են հաշվառման հետ։
- Կրկնվող ծախսերի (ծրագրեր, հոսթինգ, գովազդ) վճարումը աստիճանաբար տեղափոխել ընկերության քարտին։
Սա ներքին վերահսկողության ամենապարզ օրինակն է. ոչ թե բյուրոկրատիա, այլ կանոն, որ գումարը չկորչի։
Ինչու է սա կարևոր ֆինանսիստի համար
Ֆինանսիստի ամսական հաշվետվությունը, բյուջեն և դրամական հոսքերի կանխատեսումը այնքան ճշգրիտ են, որքան հաշվառումը, որի վրա հենվում են։ Եթե ծախսերի մի մասը մնում է անձնական քարտերի վրա, թվերը ամբողջական չեն, և «որքա՞ն շահույթ ունեցանք» հարցի պատասխանը սխալ է։ Դրա համար, երբ սկսում ենք աշխատել նոր ընկերության հետ, առաջին հերթին ստուգում ենք՝ արդյոք բոլոր բիզնես ծախսերն են հաշվառված։
Ինչպես ենք աշխատում Getwing-ում
Մենք ապահովում ենք ճշգրիտ և ամբողջական հաշվապահություն՝ ներառյալ անձնական քարտերով վճարված բիզնես ծախսերը, օգնում ենք ներդնել պարզ ներքին կանոններ, իսկ ֆինանսիստը դրա հիման վրա ամեն ամիս ցույց է տալիս՝ որքան եք իրականում վաստակել և ինչ անել հետո։
Կարդացեք մեր ֆինանսիստի (CFO) ծառայությունների և հաշվապահական հաշվառման մասին կամ գրեք մեզ WhatsApp-ով։
